ஈரான் போர்நிறுத்தத்திற்குப் பகரமாக இஸ்ரேலுடன் உறவை புதுப்பிக்க அரபு நாடுகளுக்கு டிரம்ப் அழுத்தம்

 

ஆக்ஸியோஸ் தகவல்

ஈரானுடனான போரை முடிவுக்குக் கொண்டுவருவதற்கான அமைதி ஒப்பந்தத்திற்குப் பிரதிபலனாக, இஸ்ரேலுடன் முறையான ராஜதந்திர உறவுகளை ஏற்படுத்திக் கொள்ள வேண்டும் என அரபு மற்றும் முஸ்லிம் நாடுகளின் தலைவர்களிடம் அமெரிக்க அதிபர் டொனால்ட் டிரம்ப் வலியுறுத்தியுள்ளதாக அதிதிடமான தகவல்கள் வெளியாகியுள்ளன.

​அமெரிக்க அதிகாரிகளை மேற்கோள் காட்டி 'ஆக்ஸியோஸ்' (Axios) ஊடகம் வெளியிட்டுள்ள அறிக்கையின்படி, சனிக்கிழமையன்று சவுதி அரேபியா, ஐக்கிய அரபு அமீரகம், கத்தார், பாகிஸ்தான், துருக்கி, எகிப்து, ஜோர்டான் மற்றும் பஹ்ரைன் ஆகிய எட்டு நாடுகளின் தலைவர்களுடன் டிரம்ப் தொலைபேசி மூலம் கூட்டு ஆலோசனை நடத்தினார்.

இந்த உரையாடலின் போது, தெஹ்ரானுடனான போரை முடிவுக்குக் கொண்டுவரும் அமெரிக்காவின் புதிய ஒப்பந்த முயற்சிக்கு எட்டு நாடுகளின் தலைவர்களும் தங்கள் முழுமையான ஆதரவைத் தெரிவித்தனர். "இந்த ஒப்பந்தத்தில் நாங்கள் உங்களுடன் இருக்கிறோம்" என்று ஒரு உயர்மட்ட அதிகாரி டிரம்பிடம் உறுதியளித்ததாகக் கூறப்படுகிறது.

​இருப்பினும், இந்த ஒப்பந்தத்தின் ஒரு பகுதியாக, 2020-ல் கையெழுத்தான வரலாற்றுச் சிறப்புமிக்க 'ஆபிரகாம் உடன்படிக்கை'யில் (Abraham Accords) இன்னும் இணையாத நாடுகள், இஸ்ரேலுடன் முறையான உறவுகளை உடனடியாக ஏற்படுத்த வேண்டும் என டிரம்ப் கோரிக்கை விடுத்தார். 

இந்த விவகாரம் குறித்து அடுத்த கட்டமாக இஸ்ரேலியப் பிரதமர் பெஞ்சமின் நெதன்யாகுவுடன் பேசவிருப்பதாக அதிபர் டிரம்ப் இக்கூட்டத்தில் குறிப்பிட்டுள்ளார். மேலும், எதிர்காலத்தில் இதே அரபு மற்றும் முஸ்லிம் தலைவர்கள் குழுவுடன் நெதன்யாகுவையும் இணைத்து ஒரு கூட்டு ஆலோசனையை நடத்த விரும்புவதாகவும் அவர் தெரிவித்துள்ளார்.

​ஈரானுடனான அமெரிக்காவின் தற்போதைய இடைக்கால உடன்படிக்கை முயற்சிகள் குறித்து இஸ்ரேலிய அரசு சில கவலைகளைக் கொண்டுள்ள சூழலில், இஸ்ரேலுக்கான ஒரு மிகப்பெரிய ராஜதந்திர வெற்றியாக பிராந்திய நாடுகளின் அங்கீகாரத்தை டிரம்ப் முன்வைக்கிறார் என்று அரசியல் ஆய்வாளர்கள் கருதுகின்றனர். டிரம்ப் நிர்வாகத்தின் தூதர்களான ஜாரெட் குஷ்னர் மற்றும் ஸ்டீவ் விட்காஃப் ஆகியோர் வரும் வாரங்களில் இந்த இயல்பாக்குதல் பேச்சுவார்த்தைகளைத் தீவிரப்படுத்த உள்ளதாகவும் வாஷிங்டன் வட்டாரங்கள் தெரிவிக்கின்றன.