மத்திய கிழக்கில் பதற்றமான சூழல் நிலவி வரும் வேளையில், சர்வதேச எரிசக்தி விநியோகத்தின் மிக முக்கிய கடல்வழிப் பாதையான ஹார்முஸ் நீரிணை, ஈரானின் "மிகப்பெரிய அதிகார ஆயுதம்" என்று டெஹ்ரான் நிர்வாகம் அறிவித்துள்ளது. அமெரிக்கா மற்றும் இஸ்ரேல் உடனான சமீபத்திய இராணுவ மோதல்களைத் தொடர்ந்து, கத்தாரின் டோஹா நகரில் இருதரப்பு தொழில்நுட்ப பேச்சுவார்த்தைகள் நடைபெற்று வரும் சூழலில் இந்த முக்கிய அறிக்கை வெளியாகியுள்ளது.
ஈரான் நாடாளுமன்ற சபாநாயகர் முகமது பாகர் காலிபாஃப் இது குறித்துப் பேசுகையில், ஹார்முஸ் நீரிணை என்பது தங்களுக்கு வழங்கப்பட்ட ஒரு தெய்வீகப் பரிசு என்றும், அதனைத் தங்களின் அதிகாரத்தை நிலைநிறுத்தும் முதன்மைப் காரணியாகப் பயன்படுத்துவோம் என்றும் குறிப்பிட்டுள்ளார். மேலும், அமெரிக்காவின் அழுத்தங்களுக்குப் பணிந்து ஈரான் தனது எரிசக்தி ஏற்றுமதியைச் செய்ய முடியாமல் போனால், பாரசீக வளைகுடா பகுதியில் இருந்து வேறு எந்தவொரு நாடும் கச்சா எண்ணெயைப் பெற்றுக்கொள்ள அனுமதிக்க முடியாது என்றும் அவர் கடுமையான எச்சரிக்கையை விடுத்துள்ளார்.
ஐக்கிய நாடுகள் பாதுகாப்புச் சபை, சர்வதேச அணுசக்தி முகமை மற்றும் அமெரிக்க நாடாளுமன்றத்தின் அனைத்து முதன்மை மற்றும் இரண்டாம் கட்டப் பொருளாதாரத் தடைகளும் முழுமையாக நீக்கப்படும் வரை, இந்த கடல்வழிப் பாதையின் மீதான ஈரானின் கடுமையான நிலைப்பாடு தொடரும் எனத் தெரிகிறது. தற்போதைய ஒப்பந்தத்தின்படி ஒவ்வொரு 60 நாட்களுக்கு ஒருமுறை இந்த விதிமுறைகள் மறுஆய்வு செய்யப்பட வேண்டும் என்ற நிபந்தனையையும் ஈரான் முன்வைத்துள்ளது.
உலகளாவிய கச்சா எண்ணெய் போக்குவரத்தில் சுமார் 20 சதவீதத்திற்கும் அதிகமான பங்கினைக் கொண்டுள்ள ஹார்முஸ் நீரிணையின் மீதான ஈரானின் முழுக் கட்டுப்பாடு மற்றும் கட்டண விதிப்பு நடைமுறைகள், உலகப் பொருளாதாரத்தில் பெரும் தாக்கத்தை ஏற்படுத்தியுள்ளன.
0 Comments