மத்திய கிழக்கு பிராந்தியத்தில் நிலவி வரும் பதற்றமான சூழ்நிலையை தணித்து, போரை முடிவுக்குக் கொண்டுவருவதற்கான சர்வதேச முயற்சிகள் தீவிரமடைந்துள்ளன. இந்த நிலையில், ஈரான் மற்றும் அமெரிக்கா ஆகிய இரு நாடுகளுக்கும் இடையேயான வரலாற்று முக்கியத்துவம் வாய்ந்த புரிந்துணர்வு ஒப்பந்தம் எட்டப்படும் சாத்தியக்கூறுகள் மிகவும் நெருக்கமாக உள்ளதாக பாகிஸ்தான் பிரதமர் ஷெபாஸ் ஷெரீப் உத்தியோகபூர்வமாக அறிவித்துள்ளார்.
இஸ்லாமாபாத்தில் செய்தியாளர்களிடம் பேசிய அவர், இரு நாடுகளுக்கும் இடையிலான பேச்சுவார்த்தைகள் இறுதி கட்டத்தை எட்டியுள்ளதாகவும், அடுத்த 24 மணி நேரத்திற்குள் இந்த அமைதி ஒப்பந்தம் அதிகாரப்பூர்வமாக கையெழுத்தாகலாம் என எதிர்பார்ப்பதாகவும் தெரிவித்துள்ளார். பிராந்திய அமைதி மற்றும் உலகளாவிய பொருளாதார ஸ்திரத்தன்மைக்கு இந்த ஒப்பந்தம் மிகவும் அவசியமானது என்றும் அவர் சுட்டிக்காட்டினார்.
கடந்த சில காலங்களாக ஈரான் மற்றும் அமெரிக்கா இடையே நீடித்து வரும் மோதல் போக்கு, சர்வதேச அளவில் கச்சா எண்ணெய் விலை உயர்வு மற்றும் பாதுகாப்பு அச்சுறுத்தல்களை ஏற்படுத்தியிருந்தது. இந்த போரை முடிவுக்குக் கொண்டுவர பல்வேறு சர்வதேச நாடுகள் மத்தியஸ்தம் வகித்து வந்த நிலையில், பாகிஸ்தான் பிரதமரின் இந்த அறிவிப்பு உலக அரங்கில் பெரும் திருப்புமுனையாக பார்க்கப்படுகிறது.
இருப்பினும், இந்த ஒப்பந்தத்தில் இடம்பெற்றுள்ள குறிப்பிட்ட நிபந்தனைகள் மற்றும் பாதுகாப்பு உத்தரவாதங்கள் குறித்த விரிவான விபரங்கள் இன்னும் அதிகாரப்பூர்வமாக வெளியிடப்படவில்லை. அடுத்த சில மணி நேரங்களில் இரு நாடுகளின் வெளியுறவு அமைச்சகங்கள் மூலமாகவே முழுமையான விபரங்கள் வெளியாகும் என எதிர்பார்க்கப்படுகிறது. தற்போதைய சூழலில் மேலதிக தகவல்கள் வெளியாகவில்லை.
0 Comments